طريقة البقلاوة بالجلاش كيفية عمل البقلاوة بالفستق والمكسرات

المقادير: 

جلاش حسب الطلب مكسرات او الحشوه التقليديه بتاعتنا (سوداني مفروم + زبيب + جوزهند ) زبده او سمن بلدى طبعا وبس اما سر الصنعه بقى هوه الماسوره اه ماسورة ستاره او ايد مقشه هههه او اى عصايه بلاستيك بس تكون مدوره ممكن جزء من شماعة تعليق هدوم بس طبعا تكون نضيفه جدا
التحضير:

 1. بنفرد لفة الجلاش زى ماهيه كده سليمه من غير تقطيع وندهن اول ورقه بالزبده ونرش عليها الحشو
2. وبعدين نحط الماسوره على حرف الورقه ونلف زى السويسرول بس عالماسوره نلف لغاية مانوصل لاخر الورقه ونسيب الماسوره زى ما هيه
3. وبعدين ندهن الورقه التانيه اللى تحتها على طول بالزبده ونجيب الماسوره بلفتها ونحطها على حرف الورقه التانيه اللى دهناها زبده ونلف برضه للاخر يعنى الماسوره هايبقى عليها ورقتين جلاش
4. و بعدين نمسك طرفين الحلاش اللى عالماسوره بايدينا الاتنين ونزقهم على بعض يعنى هانكشكش رول الجلاش وهوه عالماسوره وماتقلقوش بيتكشكش بمنتهى السهوله
علشان كده قلتلكوا لازم تكون الماسوره او العصايه مدوره او اسطوانيه
5. و بعدكده نسحب رول الجلاش من على الماسوره ببساطه
6. ونرصه فى صينيه مدهونه زبده
7. وهنا الحشوه خلصت واتبقى ورقتين جلاش رحت حاطه بدالها شيكولاته
8. كده خلصت الجلاش كله
9. بندخله فرن حرارته اقرب للعالى بيقعد حوالى تلت ساعه او نص ساعه بالكتير
10. ولما يخرج من الفرن نسقيه بالشربات عادى واحلى حاجه اننا مش بنقطعها قبل ما تدخل الفرن لالالالالا بنقطعها بعد ماتطلع من الفرن ونسقيها بالشربات وبتبقي سهله جدا فى التقطيع